لو قلت دمي من [ذهب] صدقوني ^_^

بسم الله الرحمن الرحيم






ياكثر ما رافقت خلاان وأحباب = وياكثر مافي شدتي هملوني
على كثر ما اعدهم ستر وحجاب = على كثر ما احتجتهم واتركوني
من صارت الاخوة ثمن حفنة تراب = نفس الوجيه اللي نصوني نسوني
من غير ذكر عروق وفروق وأنساب = كانوا ثلاثة والثلاثة جفوني
علمتهم وشلون الأهداف تنصاب = ولما سواعدهم قوت صوبوني
عشاني أصغرهم عمر صاروا أحزاب = عشاني أصدقهم قصيد ظلموني
اللي نجاح اسمي زرع فيهم أنياب = حتى النصيحة مابغوا ينصحوني
دام العطايا عندهم دين وأتعاب = والله لو أطلب ذنبهم ماعطوني
طالب نصيحة كني طالب رقاب = وهي نصيحة كيف لو زوجوني
كنت أكتب لنفسي مشاريه وعتاب = ولاأدري إن اللي قروني قروني
تضاربت من دوني عقول وألباب = واجد بغوا غيري وواجد بغوني
أقفل هدب تسهر على شعري أهداب = كني حبست رقادهم في جفوني
لوشفتهم واحد يشوفوني سراب = من وين مالدوا نظرهم لقوني
أثري وجودي بينهم محرق أعصاب = ومزعل بعضهم من بعض لوطروني
ياكبري بعيني وأنا توني شاب = وأهم كتاب الشعر حاربوني
حتى ولو يهوي على نجمي شهاب = يكفيني إن اسمي كبير بعيوني
قد قال أبوي إن هبتهم قول ما أهاب = لويقدرونك .. قول ما تقدروني
ومادام قبري محتضن راس مرقاب = على كثر ماتقدرون ادفنوني
لوماني بذيب انهشت عظمي ذياب = لوماقدرت أثبت وجودي لغوني
لوما سكنت وجيههم مت بغياب = لو ماعرفت امحي ورقهم محوني
ماجيت أبدبل كبدهم شعر وخطاب = لين أدبلوا كبد الذي خلفوني
من يوم ماحاز قلمي كل الألقاب = قلبتهم في دفتري و حفظوني
الله وهبنيهم بني عم وأجناب = من يوم جيت أعجبتهم وأعجبوني
و إعجابهم فيني مهوب أية إعجاب = بأسلوبي بشرحي بطرحي بلوني
لو قلت عن نفسي بشر صرت كذاب = لو قلت دمي من ذهب صدقوني
لو بيدهم كان زرعوا دربي أعشاب = لو كيفهم يتشبهون اشبهوني
من كثر ماصاروا من طبوعي قراب = حتى بلبسة شمغهم قلدوني
واجد دعوني وأغلقوا دوني الباب = وكثار ناس أبكي لهم مابكوني
مادام حطم فيني عيوب وأنساب = جنبت عنهم مثل ماجنبوني
أصلاً لو إن باخوتي شي ينعاب = ذبحت نفسي قبل لايذبحوني
أنا يدي لوماكست متني ثياب = نذر علي أقطع يدي من متوني
مو عيب أجي مدعو ولا أشوف ترحاب = العيب لو إني رجعت إن دعوني
مادمت أجي ولا يحسبوا لي حساب = حرمت أروح ،، إذا يبوني يجوني..!!




للشاعر : حامد زيد

أتمنى ان تروقكـم